Þróun iPhone 5 var komin langt á leið - Jobs sagði nei takk

Nokkrum vikum áður en Apple kynnti iPhone 4S voru verkfræðingar tölvurisans að vinna að algjörlega nýrri týpu snjallsímans. Heimildarmaður vefsíðunnar Businessinsider.com segir að starfsmenn Apple hafi verið undir þeirri trú að iPhone 5 yrði næsta skref í þróun snjallsímans.

Þónokkrir urðu fyrir vonbrigðum þegar tölvurisinn opinberaði nýjastu útgáfu iPhone snjallsímans. Í aðraganda útgáfunnar töldu margir að Apple myndi kynna iPhone 5 en raunin var önnur.

Heimildarmaður Businessinsider segir að hönnun iPhone 5 hafi verið komin langt á leið. Síminn hefði haft stærri skjá en forveri sinn og 10 megapixla linsu á myndavél sinni.

Talið er að Steve Jobs, fyrrverandi stjórnarformaður Apple, hafi verið afar óánægður með hönnun iPhone 5. Hann þoldi ekki stærðina á skjánum. Einnig var ljóst að vandamál var með orkunýtingu símans.

Aðdáendur iPhone þurfa þó að öllum líkindum ekki að bíða lengi því talið að iPhone 5 verði kynntur á næsta ári.