PKD smit útbreitt á Íslandi

PKD-nýrnasýki var fyrst staðfest á Íslandi á haustmánuðum 2008. Í framhaldi af því hafa umfangsmiklar rannsóknir farið fram á útbreiðslu og áhrifum sýkinnar á íslenska laxfiskastofna. Verkefnið er samstarfsverkefni Tilraunastöðvar Háskólans að Keldum og Veiðimálastofnunar og var styrkt af Orkuveitu Reykjavíkur og Umhverfissviði Reykjavíkurborgar.

Niðurstöður rannsóknanna benda til þess að smásæja sníkjudýrið, Tetracapsuloides bryosalmonae, sem sjúkdómnum veldur, sé útbreitt meðal laxfiska á Íslandi. Sýni hafa verið rannsökuð úr laxfiskum átta stöðuvatna og þriggja áa víðsvegar um landið. Smit hefur verið staðfest í sjö vötnum og tveimur ám. Sjúkir fiskar hafa greinst í 6 vatnanna og einni á. Öll vötnin, þar sem smit hefur fundist, eiga það sammerkt að vera grunn og geta því hitnað mikið yfir sumartímann. Í flestum þeirra hefur bleikjustofnum hnignað mikið síðastliðna áratugi. Ástæða er til þess að ætla að PKD-nýrnasýki eigi þátt í þeirri hnignun.

PKD-nýrnasýki orsakast af smásæju sníkjudýri, Tetracapsuloides bryosalmonae, en tilvist þess krefst tveggja ólíkra hýsiltegunda, mosadýra og laxfiska. Sjúkdómur kemur ekki upp í fiskunum nema vatnshiti nái 12°C eða meira í 1-3 mánuði yfir sumartímann. PKD-nýrnasýki er álitin alvarlegur sjúkdómur og hefur valdið miklu tjóni í eldi laxfiska erlendis. Allmörg dæmi eru einnig um afföll í villtum stofnum laxfiska vegna sýkinnar. Sýkin virðist vaxandi vandamál í Norður Evrópu og er það jafnan heimfært á hnattræna hlýnun.

PKD-nýrnasýki var fyrst staðfest á Íslandi á haustmánuðum 2008. Í framhaldi af því hafa umfangsmiklar rannsóknir farið fram á útbreiðslu og áhrifum sýkinnar á íslenska laxfiskastofna. Verkefnið er samstarfsverkefni Tilraunastöðvar Háskólans að Keldum og Veiðimálastofnunar og er styrkt af Orkuveitu Reykjavíkur og Umhverfissviði Reykjavíkurborgar.

Meira á https://www.veidimal.is/default.asp?sid_id=22185&tid=2&fre_id=121439&meira=1&Tre_Rod=001|001|007|&qsr