Rjúpnaveiðin hófst í morgun

Rjúpnaveiðar hófust í morgun og viðraði vel til veiða víðast hvar á landinu.  En veðrið um helgina er ekkert sérstakt og frekar slakt til rjúpnaveiða, menn geta þá bara vonað að næstu þrjár helgar verði skárri.

Veiðidagarnir eru níu og menn eru hvattir til að gæta hófs við veiðarnar enda stofnin í lægð.  Skyttur ræða sín á milli hversu mikið ref hefur fjölgað á landinu og víða er hann orðinn svo spakur að fólk kemst ansi nálægt honum áður en hann tekur til fótana.  Refastofnin telur um 8000 dýr, að talið sé, í dag og hefur honum fjölgað jafnt og þétt frá áttunda áratugnum.

Um 800 veiðikort hafa verið gefin út sem er umtalsverð fækkun frá þvíí fyrra og ljóst að margir veiðimenn ætla að snúa sér að annari bráð fyrir jólin.

Við heyrðum í einum sem hefur alltaf farið á rjúpu en sleppir því í ár og ætlar að ná í önd í staðinn, enda er hún ekki síðri villibráð og ekki í neinni lægð.  Það er mikið af skemmtilegum möguleikum til andaveiða víða um landið og það er kannski spurning hvort þetta sé það sem koma skal í jólahaldi landans?