Góð gæsaveiði síðustu daga

Gæsaveiðin síðustu daga hefur verið mjög góð, og þá sérstaklega á suðurlandsundirlendinu.  Mikið af gæs er farin af safnast saman í akra og á tún og á sumum stykkjunum eru þær í þúsunda tali.

Mjög lítið sést af heiðagæs enda er hún líklega í flestum tilfellum farin af landinu, en við höfum líka fengið fréttir að mikið hefur sést til helsingja í sveitunum við Hornafjörð og eru margar skyttur á leiðinni þangað þessa helgina af þeim sökum.

Þrátt fyrir einhver afföll í varpinu í vor virðist vera mikið af grágæs og einnig virðist sem blesgæsin sé að jafna sig eftir nokkur mögur ár.  Hún er ennþá friðuð og eru veiðimenn beðnir um að gæta þess þegar skotið er á gæs að láta hópana eiga sig ef það er blesgæs.  Hún þekkist vel frá grágæs þegar hún lætur heyra í sér því hljóðið í henni er hvellt og stutt.

Svo styttist í rjúpnaveiðina!