Hellas Verona keypti Emil

Emil Hallfreðsson hefur gengið formlega til liðs við Hellas Verona eftir að hafa verið í láni hjá félaginu allt síðasta tímabil.

Emil hefur verið á mála hjá Reggina undanfarin ár en var lánaður til Hellas Verona síðastliðið sumar. Þar hefur honum gengið vel en félagið tryggði sér sæti í ítölsku B-deildinni nú á dögunum.

Emil spilaði alls 34 leiki með félaginu og skoraði í þeim fjögur mörk. Emil hélt í atvinnumennskuna árið 2005 þegar hann samdi við Tottenham en hefur síðan þá spilað með Malmö í Svíþjóð, Lyn í Noregi, Barnsley í Englandi og Reggina, til að mynda í ítölsku úrvalsdeildinni.