Inter öruggt með annað sætið á Ítalíu

Inter og Napoli skildu í kvöld jöfn, 1-1, í ítölsku úrvalsdeildinni í kvöld. Inter tryggði sér þar með annað sæti deildarinnar.

Napoli var einnig sátt með úrslitin en með stigin gulltryggði liðið sér þriðja sætið og þarf þar með ekki að taka þátt í forkeppni Meistaradeildarinnar á næstu leiktíð.

Samuel Eto'o kom Inter yfir á fimmtándu mínútu en Juan Zuniga jafnaði metin fyrir Napoli á lokamínútu fyrri hálfleiks. Síðari hálfleikur var heldur óspennandi þar sem bæði lið virtust sátt við sitt.

AC Milan er þegar búið að tryggja sér meistaratitilinn en Udinese og Lazio munu berjast um síðasta Meistaradeildarsætið. Udinese er með 65 stig en Lazio 63 fyrir lokaumferðina sem fer fram um næstu helgi.