Does it Offend You, Yeah? - Don't Say We Didn't Warn You

Önnur plata bresku indí-teknó háskólakrakkana frá Reading. Fyrsta platan var nægilega beitt til þess að ýta tónleikaferðalagstannhjólinu af stað. Sveitin hefur því verið á linnulausu ferðalagi heimshornanna á milli síðan fyrri platan, You Have No Idea What Your getting Yourself into, kom út árið 2008. Það var fín plata en þar stóð hæst upp úr lagið Let's Make Out sem Sebastian Grangier úr Death From Above 1979 söng.

Sveitin hefur þó aðallega getið af sér gott orð sem tónleikasveit. Það lekur gríðarleg orka af þeim af sviði og sagt er að enginn maður fari óhreyfður frá þeirri upplifun. Reyni menn að standa kjurrir þá sé tónlistin og stuð-bylgjan sem flæðir frá sviðinu í gegnum áhorfendur nægilega til þess að koma hverjum manni sem er af stað. Leiðum ófrískum konum sem eru komnar framyfir er bent á þennan möguleika vilji þær missa vatnið. Á sviði er DIOYY m.a. líkt við LCD Soundsystem, !!! og Prodigy.

Á þessari annarri plötu nær sveitin svo að fanga þessa orku nokkuð betur en á þeirri fyrri. Sum lög eru svo barmafull af stuðandi bylgjum að það er ómögulegt að hlýða á án þess að heillast með. Skýrsta dæmið er Wrestler. Elektrósmellur sem er keyrður áfram á svipuðum batteríum og Prodigy gerðu með sín bestu lög. Lag sem hefur alla burði í það að verða stærsti klúbbasmellur ársins.

Galli plötunnar er að hún er ekki mjög heilsteypt. Það er eins og liðsmenn DIOYY hafi ekki alveg gert upp hug sinn hvort þeir vilji vera teknósveit eða indírokkarar. Þannig skipast á í bland indípopplög við teknósmelli - sem er fínt hafi menn víðan tónlistarsmekk - en ekki söluvænt fyrir þá sem heillast kannski einungis af öðru hvoru og vilja heila plötu á svipaðri bylgjulengd. Þannig er lagið Pull Out My Insides afar útvarpsvænt en það hljómar stundum meira eins og Death Cab For Cutie en DIOYY. Ég fíla þessa skítugu pönkuðu hlið sveitarinnar töluvert betur en daðrið við indípoppið. Það er nóg af þannig sveitum - en örfáar sem ná að tengjast sömu orku í teknóslögurum og þessi.

3.5 / af 5 stjörnum

bestu lög:

We Are the Dead

The Monkeys are Coming

Pull My Insides

Wrestler