Margrét Lára bæði markahæst og stoðsendingahæst

Margrét Lára Viðarsdóttir hefur byrjað tímabilið frábærlega með Kristianstad í sænska kvennafótboltanum. Margrét Lára átti þátt í öllum þremur mörkum Kristianstad í 3-1 útisigri á Piteå í gær og hefur nú komið með beinum hætti að sex af níu mörkum síns liðs í fyrstu fjórum umferðunum.

Frammistaða íslensku landsliðskonunnar á mikinn þátt í því að Kristianstad-liðið er nú í öðru sæti með 9 stig af 12 mögulegum og markatöluna 9-2 en ekkert lið í deildinni hefur skorað fleiri mörk það sem af er.

Margrét Lára er nú bæði markahæst og stoðsendingahæst í sænsku deildinni. Hún hefur skorað fjögur mörk í leikjunum fjórum og er að auki búin að gefa tvær stoðsendingar. Margrét Lára hefur komið að tveimur fleiri mörkum en næstu konur á listanum.

Margrét Lára átti þátt í 14 mörkum á síðasta tímabili í 21 leik, skoraði þá 10 mörk og átti 4 stoðsendingar.