Del Piero eltir enn HM-drauminn

Alessandro Del Piero segist gera allt sem í hans valdi stendur til að Marcello Lippi, þjálfari Ítalíu, geti ekki annað en tekið sig með á heimsmeistaramótið í sumar.

Þessi 35 ára leikmaður var ekki valinn í hópinn sem lék vináttulandsleik gegn Kamerún í gær en hann hefur verið að leika vel með Juventus að undanförnu.

„Ég er enn að elta drauminn. Það er alveg ljóst að ég þrái að fara með á HM," sagði Del Piero.

„Það er ein besta tilfinning sem hægt er að finna að klæðast ítölsku treyjunni. Maður kemst varla hærra en að leika fyrir hönd þjóðar sinnar á heimsmeistaramóti. Það var ólýsanlegt þegar við unnum keppnina 2006."