Balotelli farinn í fríið

„Ég er farinn í fríið," sagði vandræðagemlingurinn Mario Balotelli á flugvellinum í Mílanó þegar hann hélt til Bandaríkjanna með félögum sínum í Inter en þar er liðið að fara í æfingaferð.

Balotelli mun mjög líklega yfirgefa Inter innan skamms og þar hefur Manchester City verið nefnt til sögunnar. Þetta er því hans síðasta ferð með Inter.

Rafael Benítez, þjálfari Inter, hefur ekkert viljað tjá sig um framtíð Balotelli. „Sjáum til hvað gerist," sagði Benítez en fyrsti leikur Inter í æfingaferðinni í Bandaríkjunum verður einmitt gegn City.

Umboðsmaður Balotelli segir að framtíð leikmannsins muni ráðast á næstu dögum. Það er því ekki ólíklegt að Balotelli haldi frá Bandaríkjunum sem leikmaður City.