Titilvonir AC Milan farnar eftir tap gegn Sampdoria

Giampaolo Pazzini tryggði Sampdoria sigur gegn tíu leikmönnum AC Milan í ítalska boltanum í dag. Hann skoraði sigurmarkið með skalla í uppbótartíma 2-1.

Marco Borriello kom AC Milan yfir á 20. mínútu en Antonio Cassano jafnaði metin úr vítaspyrnu þegar klukkutími var liðinn af leiknum. Daniele Bonera var sá brotlegi og fékk jafnframt að líta rauða spjaldið.

Sampdoria nýtti sér liðsmuninn og tryggði sér þrjú stig. Liðið er nú í fjórða sæti deildarinnar. Titilvonir AC Milan eru horfnar á braut. Liðið er sex stigum frá efsta sætinu og sá munur gæti aukist í kvöld ef Roma vinnur Lazio og endurheimtir efsta sætið.