Moggi: Mourinho er allt of strangur

Gamli Juventus-maðurinn, Luciano Moggi, er ekki alls kostar sáttur við það hvernig Jose Mourinho, þjálfari Inter, fer með ungstirnið Mario Balotelli þessa dagana.

„Ég er alls ekki sammála því hvernig Inter er að höndla þetta mál," sagði Moggi.

Balotelli hefur ekkert leikið með liðinu síðan 7. mars en þá slettist upp á vinskap hans og Mourinho. Portúgalski þjálfarinn hefur fryst leikmanninn síðan.

„Í svona málum þarf að vera samstarf á milli stjórnar og þjálfara svo hægt sé að velja besta farveginn. Mér finnst Mourinho vera allt of strangur við Balotelli. Ég myndi hugsa mig 100 sinnum um áður ég gerði þetta, sérstaklega þar sem mikilvægur lokasprettur er fram undan."