Ítalskir leikmenn hættir við að fara í verkfall um helgina

Leikmannasamtök ítölsku A-deildarinnar hafa hætt við boðað verkfall um helgina eftir að þau náðu samkomulagi við forráðamenn ítölsku deildarinnar í gær. Samingurinn hefur ekki verið undirritaður en leikmenn hafa engu að síður hætt við verkfallið.

Það hefur gengið mikið á í samningarviðræðum leikmannasamtakanna og stjórnarmanna ítölsku deildarinnar en leikmenn vildu fá meiri réttindi sem og jafnframt að halda þeim möguleika að geta hafnað félagsskiptum sem þótti ekki vinsælt hjá forráðamönnum félaganna.

„Loksins hafa náðst sættir um þessi mál og við höfum náð að setja saman samning sem báðir sætta sig við," sagði Maurizio Beretta yfirmaður ítölsku A-deildarinnar. Samingurinn verður væntanlega undirritaður í næstu viku.