Rooney fær sér skál af morgunkorni fyrir leiki

Leikjaundirbúningur hjá einum besta knattspyrnumanni heims, Wayne Rooney, er ekki eins heilsusamlegur og margur hefði haldið. Ólíkt flestum fær hann sér ekki pasta eða gufusoðið grænmeti. Hann kýs frekar skál af morgunkorni en það er vani sem hann losnar ekki við.

„Ég fæ mér nánast alltaf skál af morgunkorni. Þá oftast Coco Pops, venjulega týpuna en ekki Moons & Stars," sagði Rooney en þessi uppljóstrun á klárlega eftir að auka söluna á þessu annars ágæta morgunkorni.

Rooney er farinn að telja niður dagana í HM en hann er ekki farinn að pakka niður enda verður lítið í ferðatöskunni hans.

„Ég tek bara Xbox-tölvuna mína og FIFA leikinn sem og skó. Ég þarf ekkert annað og er ekki með neinn happabol eða eitthvað álíka," sagði Rooney.

Félagi hans í enska landsliðinu og hjá Man. Utd, Rio Ferdinand, segir að Rooney sé maðurinn sem enginn vilji vera í herbergi með.

„Rooney er martraðarherbergisfélagi því hann hefur margar skrýtnar venjur. Hann sefur alltaf með hárblásara við hliðina á sér og svo á hann það til að vakna á furðulegustu tímum og biðja menn um að spila FIFA við sig," sagði Rio.