Ronaldinho fær tvo leiki til að sanna sig

Brasilíumaðurinn Ronaldinho fær tvo leiki til þess að sanna sig fyrir þjálfara AC Milan, Massimiliano Allegri. Ef hann stendur sig vel og sýnir virkilega vilja til þess að vera hjá félaginu þá fær hann nýtt samningstilboð.

"Aðeins leikmenn sem vilja vera hjá Milan eiga að vera þar," sagði Allegri reiður en honum finnst talsvert vanta upp á andann hjá Brassanum.

Silvio Berlusconi, forseti AC Milan, hefur iðulega varið Ronaldinho fram í rauðan dauðann og Allegri fundaði með honum um Ronaldinho.

Sá fundur virðist hafa skilað einhverju því Berlusconi er einnig að verða þreyttur á andleysinu í Ronaldinho.