Ronaldinho vill spila til fertugs

Þó svo Brasilíumaðurinn Ronaldinho hafi oft virkað áhugalaus síðustu ár og verið duglegur að hlaða á sig kílóum yfir sumartímann er hann alls ekkert á því að hætta í fótbolta.

Tímabilið í fyrra var aftur á móti frábært hjá Brassanum sem fann neistann aftur.

"Það var ekki auðvelt að finna neistann aftur eftir að hafa unnið allt með Barcelona. Ég fann þó neistann í fyrra þökk sé þáverandi þjálfara, Leonardo," sagði Ronaldinho.

"Ég hef metnað til þess að komast aftur í landsliðið og það væri frábært að spila á HM 2014. Ég er jafnvel að hugsa um HM 2018 líka. Aldurinn er ekkert vandamál. Ég lék með Maldini sem spilaði þegar hann var fertugur. Ég myndi vilja gera slíkt hið sama."