Balotelli enn úti í kuldanum

Sóknarmaðurinn Mario Balotelli og þjálfarinn Jose Mourinho hafa enn ekki grafið stríðsöxina. Balotelli er ekki í leikmannahópi Inter sem mætir Roma á morgun.

Þetta er fimmti leikur Inter í röð þar sem þessi 19 ára leikmaður er utan hóps. Hann sást yfirgefa æfingasvæði Inter í morgun en leikmannahópur félagsins ferðast til Rómar síðdegis.

Deilur Balotelli og Mourinho hafa staðið yfir síðan 7. mars þegar talsmaður leikmannsins sagði að hann hefði verið neyddur til að spila þrátt fyrir að vera veikur. Mourinho neitaði því og sagði læknalið Inter hafa úrskurðað leikmanninn leikfæran.

Þessi ummæli uppskáru hörð viðbrögð frá Balotelli og fjölskyldu hans en bróðir hans lét meðal annars í sér heyra í fjölmiðlum. Ekki varð staða Balotelli betri þegar hann kæddist treyju AC Milan í sjónvarpsþætti fyrr í vikunni.