Marca: Real Madrid undirbýr jarðveginn fyrir Mourinho

Samkvæmt spænska dagblaðinu Marca eru forráðamenn Real Madrid þegar byrjaðir að þreifa fyrir sér til að kanna möguleikann á að fá knattspyrnustjórann Jose Mourinho til félagsins frá Inter næsta sumar.

Knattspyrnustjórinn Manuel Pellegrini hefur átt undir högg að sækja í raun alla tíð síðan hann tók við Real Madrid síðasta sumar og tapið gegn Lyon á dögunum í fyrri leik liðanna í 16-liða úrslitum í Meistaradeildinni gerði lítið annað en að auka á pressuna á hann.

Forráðamenn Real Madrid eru því sagðir þegar vera búnir að tala við umboðsmann Mourinho en Portúgalinn mun vera með klásúlu í samningi sínum sem gerir honum kleift að yfirgefa ítalska félagið strax næsta sumar.

Mourinho hefur þegar skilað einum meistaratitli til Inter og er á góðri leið með að bæta öðrum meistaratitli í safnið á yfirstandandi tímabili en hann hefur talsvert verið orðaður við önnur félög á síðustu mánuðum og útlit fyrir að hann gæti verið á förum frá Inter.