Lánsmaðurinn reyndist eigendum sínum erfiður

AC Milan tapaði í kvöld fyrir AS Roma í ítölsku úrvalsdeildinni, 1-0. Marco Boriello skoraði eina mark leiksins á 69. mínútu.

Boriello er reyndar á mála hjá AC Milan en er lánsmaður hjá Rómverjum. Hann hefur skorað sjö mörk í fimmtán leikjum í deildinni í haust.

Milan er með 36 stig á toppnum og hafði ekki tapað í sjö deildarleikjum í röð. Liðið er enn með sex stiga forystu á toppi deildarinnar en Juventus, Napoli og Lazio eiga öll möguleika á að minnka muninn í þrjú stig á morgun.

Roma komst upp í fimmta sæti deildarinnar með sigrinum í kvöld en liðið er með 29 stig.

Inter varð í dag heimsmeistari félagsliða en liðið er í sjöunda sæti deildarinnar með 23 stig en á þó tvo leiki til góða á granna sína í Milan.