Lyn í miklum fjárhagsörðugleikum - Indriði á leið burt?

Svo gæti farið að norska liðið Brann verði með alíslenska varnarlínu. Norskir fjölmiðlar greina frá því í dag að landsliðsmaðurinn Indriði Sigurðsson sé á óskalista félagsins en hann er samningsbundinn Lyn.

Lyn á í mjög miklum fjárhagsörðugleikum og þarf að selja leikmenn. Félagið hefur samið við leikmenn sína um 7,5% launalækkun og þá sjá leikmennirnir sjálfir um að þrífa æfingafötin og færri ferðast með liðinu í útileiki. Allt er gert til að spara hverja einustu mögulegu krónu.

Lyn situr í botnsæti norsku úrvalsdeildarinnar. Indriði er talinn líklegur til að vera fyrsti leikmaðurinn til að hverfa á braut en Vålerenga hefur einnig áhuga á að fá hann. Tveir aðrir Íslendingar eru á mála hjá Lyn, Theodór Elmar Bjarnason og markvörðurinn Arnar Darri Pétursson.

Brann situr í sjötta sæti norsku deildarinnar en hjá liðinu eru Íslendingarnir Kristján Örn Sigurðsson, Ólafur Örn Bjarnason, Birkir Már Sævarsson, Gylfi Einarsson og Ármann Smári Björnsson.