Deportivo þarf að bíða eftir Dos Santos

Deportivo getur ekki fengið Giovanni dos Santos, leikmann Tottenham, að láni fyrr en að félagaskiptaglugginn opnar um næstu mánaðamót.

Forráðamenn Deportivo hafa mikinn áhuga á að fá dos Santos í sínar raðir og sjálfur hefur leikmaðurinn áhuga á að finna sér nýtt félag þar sem hann á meiri möguleika á því að fá að spila reglulega.

Dos Santos var reyndar í byrjunarliði Tottenham gegn Preston í ensku deildabikarkeppninni í vikunni en var tekinn snemma af velli vegna meiðsla.

En samkvæmt reglum spænska knattspyrnusambandsins er félögum þar í landi ekki heimilt að fá lánsmenn frá öðrum löndum nema þegar félagaskiptaglugginn er opinn. Hann opnar ekki á ný fyrr en um áramótin.