Adriano horfinn

Það er mikil dramatík í kringum brasilíska framherjann Adriano sem fyrr. Hann skilaði sér ekki á tilsettum tíma til Inter eftir landsleikjahléið og það nær enginn í hann. Umboðsmaður hans segist ekki einu sinni vita hvar hann sé niðurkominn.

Adriano missti af flugvélinni frá Brasilíu til Evrópu en allir aðrir félagar hans í brasilíska landsliðinu náðu þó vélinni.

„Ég veit ekki af hverju hann er enn í Brasilíu. Hann sagði mér síðast í gær að allt væri í góðu hjá sér. Svo fór hann ekki í vélina og ég lét forráðamenn Inter vita. Ég hef verið að reyna að ná í hann en án árangurs," sagði Gilmar Rinaldi, umboðsmaður Adriano.

Forráðamenn Inter hafa ekkert viljað tjá sig um málið en framherjinn má búast við þungri sekt þegar hann loksins snýr aftur til Mílanó.