Vålerenga vill kaupa Kristján Örn frá Brann - er ekki til sölu

Landsliðsmaðurinn Kristján Örn Sigurðsson hefur spilað vel með Brann í norsku úrvalsdeildinni á tímabilinu og er af mörgum talinn vera einn besti miðvörður deildarinnar. TV 2 greinir frá því að Vålerenga hafi mikinn áhuga á að kaupa Kristján frá Brann.

Vålerenga fór að sýna Kristjáni mikinn áhuga eftir að fyrirliði liðsins og miðvörður, André Muri, meiddist illa í leik á móti Tromsö á mánudaginn.

Brann vill alls ekki selja einn sinn besta mann en samningur Kristjáns við Bergen-liðið rennur út í árslok. Brann vill framlengja en veit að Kristján hefur hug á að reyna fyrir sér í sterkari deild.