Ranieri ræðir við stuðningsmenn

Claudio Ranieri, þjálfari Juventus, gerðist ákaflega alþýðlegur í dag þegar hann spjallaði við stuðningsmenn félagsins. Stuðningsmennirnir tóku vel á móti þjálfaranum og báðu hann um að koma með titilinn aftur til Tórínó.

„Við erum að reyna að vinna fyrir ykkur," sagði Ranieri og hvatti stuðningsmennina til þess að gefast ekki upp. Hann sagði Juventus enn eiga möguleika á því að ná Inter sem situr þægilega í efsta sæti deildarinnar.

„Þetta verður æsilegur lokasprettur því öll lið hafa að einhverju að keppa og ekkert lið mun gefa stig eftir baráttulaust," bætti Ranieri við.

Inter mætir Udinese á útivelli um helgina en Juve tekur á móti Chievo sem hefur verið á fínni siglingu upp á síðkastið.

Eftir tvær vikur mætast síðan Inter og Juventus á heimavelli Juve. Þann leik verður Juventus að vinna til þess að eiga möguleika á titlinum.