Hrafnhildur setti Íslandsmet - Ragnheiður nálægt sínu besta

Íslenska sundfólkið fer afar vel af stað á Heimsmeistaramótinu í sundi sem nú fer fram í Rómarborg á Ítalíu.

Í morgun setti Hrafnhildur Lúthersdóttir úr SH nýtt Íslandsmet í 200 metra bringusundi þegar hún synti á tímanum 2:31,39 en gamla metið hennar var 2:32,29 og því um stórbætingu að ræða. Tíminn skilaði henni í 37. sæti af 67 keppendum.

Ragnheiður Ragnarsdóttir úr KR keppti í 100 metra skriðsundi í morgun og synti á tímanum 55,78 sekúndur sem er aðeins 12/100 frá íslandsmeti hennar í greininni. Ragnheiður endaði í 27. sæti af 166 keppendum en hún keppir í 50 metra skriðsundi á laugardaginn.