Stefán Þór með flottan leik í stórsigri Norrköping

Stefán Þór Þórðarson skoraði eitt marka IFK Norrköping FK og fiskaði víti í 5-1 sigri liðsins á Falkenbergs FF í sænsku b-deildinni en Falkenberg var í 3. sæti deildarinnar fyrir leikinn eða tíu sætum ofar en Norrköping.

Gunnar Þór Gunnarsson spilaði einnig allan leikinn eins og Stefán Þór. Gunnar Þór var í vinstri bakverðinum en Stefán lék í tveggja manna framlínu liðsins.

Stefán Þór hefur haft frábær áhrif á IFK Norrköping FK en liðið sem hefur verið í fallhættu í allt sumar er búið að vinna tvo fyrstu leikina síðan að hann kom inn í byrjunarliðið. Í leiknum á undan vann Norrköping 2-1 útisigur á Jönköpings Södra sem var einnig mun ofar en liðið í töflunni.

IFK Norrköping FK var aðeins búið að vinna einn leik áður en Stefán Þór snéri aftur til félagins en hann spilaði með liðinu frá 2005 til 2007.