Franskir lúðrahljómar

Blásaraoktettinn Hnúkaþeyr býður upp á franska tónlist og stemmningu á tónleikum á Kjarvalsstöðum á morgun kl. 17. Flutt verða tvö verk fyrir 10 blásara eftir Jean Françaix: 9 Pièces Caractéristiques og Sept danses, hvort tveggja dramatísk verk í mörgum þáttum, þar sem ólíkur karakter hljóðfæranna fær að njóta sín. Þá verður flutt verkið Octanphonie eftir Eugène Bozza og hinn sívinsæli blásarakvintett eftir Jacques Ibert, Trois pièces brèves. Flytjendur á tónleikunum eru: Anna Sigurbjörnsdóttir, Arna Kristín Einarsdóttir, Ármann Helgason, Berglind Stefánsdóttir, Darri Mikaelsson, Emil Friðfinnsson, Eydís Franzdóttir, Kristín Mjöll Jakobsdóttir, Peter Tompkins og Rúnar Óskarsson.

Hnúkaþeyr hóf starfsemi sína árið 2003 og hefur síðan komið reglulega fram á tónleikum í Reykjavík og á landsbyggðinni, síðast á Myrkum músíkdögum 2008 þar sem hópurinn frumflutti tvö ný íslensk verk. Markmið Blásaraoktettsins Hnúkaþeys er að auðga menningarlíf okkar með því að efna reglulega til tónleika þar sem fluttir eru blásaraoktettar, auk tónlistar fyrir stærri og smærri hópa þar sem blásturshljóðfæri eru í forgrunni.

Að frönskum hætti verður boðið upp á létta drykki í lok tónleikanna í samvinnu við Alliance Francaise. Ókeypis er fyrir börn og ungt fólk að 21 árs aldri, miðaverð fyrir fullorðna er 500 krónur.- pbb