Materazzi beðinn afsökunar

Enska blaðið Daily Star mun birta afsökunarbeiðni til ítalska varnarmannsins Marco Materazzi eftir að hafa prentað um hann lygar í kjölfar uppákomu milli hans og Zinedine Zidane á úrslitaleiknum á HM árið 2006.

Blöðin sökuðu ítalska landsliðsmanninn um að hafa beitt Zidane kynþáttaníð með þeim afleiðingum að sá franski skallaði hann í bringuna og lét reka sig af velli eins og frægt er orðið.

Materazzi var viðstaddur dómsúrskurð í London í dag þar sem blöðin voru dæmd til að biðja hann afsökunar á skrifum sínum. Varnarmaðurinn var mjög ánægður með niðurstöðuna.

"Ég kann vel að meta afsökunarbeiðnina í Daily Star. Sannleikurinn er að koma út og ég vona að önnur blöð sem birtu lygar um mig muni í framhaldinu sjá að sér. Ég verð ekki ánægður fyrr," sagði Materazzi.