Mourinho: Ég þoli ekki fjölmiðlafundi

Jose Mourinho þjálfara Inter á Ítalíu vefst aldrei tunga um tönn í viðtölum en hann segist ekki þola fjölmiðlafundi.

Mourinho gerði það gott og var umsetinn fjölmiðlamönnum bæði hjá Porto og Chelsea, en samkvæmt reglum á Ítalíu þarf hann að eyða enn meiri tíma í fjölmiðlafundi en áður.

"Ég þarf alltaf að tala við fjölmiðlamenn í klukkutíma í senn og ég þoli það ekki. Ég gjörsamlega þoli það ekki," sagði Mourinho í sjónvarpsviðtali á Sky.

"Ég verð að aðlagast þessu samkvæmt samningi mínum, en ég mun aldrei njóta þess að sitja fjölmiðlafundi," sagði Portúgalinn.