Einar Áskell stígur fram

Það eru rétt tuttugu ár síðan Einar Áskell birtist fyrst á íslensku leiksviði og naut þegar mikillar hylli yngstu kynslóðarinnar sem hafði alist upp með þessum sænska velferðardreng.

Nú birtist hann enn á sviðinu og að þessu sinni í útgáfu brúðumeistarans Bernd Ogrodnik. Á laugardag frumsýnir Þjóðleikhúsið, í samvinnu við Fígúru - leikhús Bernds Ogrodniks, brúðuleiksýninguna Klókur ertu, Einar Áskell.

Gestaleikur þessi er verk brúðugerðarmannsins Bernds Ogrodniks sem byggir á sögum Gunillu Bergström um þennan uppátækjasama snáða. Sýnt verður í Kúlunni, barnasviði Þjóðleikhússins á Lindargötu 7, og hefst sýningin kl. 15.

Einar Áskell hefur verið aufúsugestur á íslenskum heimilum hátt í fjóra áratugi. Bækurnar um hann hafa komið út reglulega og sumar í fleiri en einni prentun. Þær yngstu af hálfu Gunillu taka á brýnum umhugsunar- og þroskaefnum barna, síðast skelfilegri fortíð nýbúa.

Ogrodnik sækir í sögu af Einari þar sem hann fær að leika við föður sinn og kemst í verkfærakassann hans. Brúðugerðarmeistarinn Bernd Ogrodnik hefur sett upp sýningar víða um heim en auk þess að semja og sýna brúðusýningar þá býr hann til brúður, gerir leikmynd og semur og flytur tónlist. Bernd hefur gert brúður af ýmsu tagi, bæði fyrir leikhús og kvikmyndir. Hér í Þjóðleikhúsinu hefur hann meðal annars sett upp sýningarnar Pétur og úlfinn og Umbreytingu - ljóð á hreyfingu.

Rithöfundurinn Gunilla Bergström hafði samband við Bernd og hafði áhuga á að vinna með honum að skemmtilegu verkefni tengdu Einari Áskeli. Afraksturinn er sýningin Klókur ertu, Einar Áskell en sýningin er byggð á bókunum Svei-attan, Einar Áskell og Góða nótt, Einar Áskell. Bernd hannar og stýrir brúðum í sýningunni auk þess að gera leikmynd hennar, leikstjóri er Kristján Ingimarsson en búninga hannar Helga Björt Möller.