Inter þarf að sýna hugrekki

Eftir að hafa tapað í grannaslagnum gegn AC Milan hefur Massimo Moratti, forseti Ítalíumeistara Inter, biðlað til leikmanna sinna að sýna hugrekki svo liðið tryggi sér ítalska meistaratitilinn.

Þegar tvær umferðir eru eftir af ítölsku deildinni er Inter með þriggja stiga forystu á Roma. „Við spiluðum of varfærnislega gegn AC Milan. Stundum eltir lukkan þá hugrökku," sagði Moratti.

Moratti skellir skuldinni þó alls ekki á Roberto Mancini, þjálfara Inter, en hann telst valtur í sessi.„Mancini hefur margoft sagt að hann vilji vera áfram og við viljum halda honum," sagði Moratti.