Maður verður í fýlu í nokkra daga

Þeir Ari Freyr Skúlason og Hannes Þ. Sigurðsson máttu bíta í það súra epli að falla úr sænsku úrvalsdeildinni með liði sínu Sundsvall í gær.

Vísir tók stöðuna á þeim Ara og Hannesi í dag og voru þeir báðir svekktir með niðurstöðuna eins og gefur að skilja. Þeir eiga báðir tvö ár eftir af samningi sínum við félagið, en segja óvissu ríkja með framhaldið.

"Ég er mjög ánægður með þetta tímabil og fannst ég bæta mig mikið. Ég hef líka heyrt það frá fólki í kring um mig," sagði Ari Freyr sem spilaði 27 leiki með Sundsvall á leiktíðinnii. Hann tekur ekki sérlega vel í fara niður um deild með liðinu.

"Það væri skref aftur á bak að fara niður um deild og mann langar auðvitað að halda áfram að spila á meðal þeirra bestu," sagði Ari Freyr. Hann segist hafa heyrt af áhuga annara félaga en segir ekki tímabært að ræða það að svo stöddu.

Hannes Þ. Sigurðsson var líka súr yfir því að liðið félli niður um deild.

"Það var leiðinlegt að tapa svona í gær en við klúðruðum þessu eiginlega í næst síðustu umferðinni. Núna verður maður í fýlu í nokkra daga en svo fer maður að skoða framhaldið," sagði Hannes, sem er ekki sérlega spenntur fyrir að spila í næstefstu deild frekar en Ari.

"Ég á tvö ár eftir af samningnum og það liggur beinast við að klára hann, en við eigum eftir að setjast niður og skoðum hvað klúbburinn ætlar að gera. Það er auðvitað engin óskastaða að fara niður um deild," sagði Hannes og bætti við að sér líkaði vel í Svíþjóð og gæti vel hugsað sér að halda þar áfram.

Sverrir Garðarsson spilaði einnig með Sundsvall þetta árið, en liðið endaði í næstneðsta sæti með tveimur stigum meira en botnlið Norrköping.