Leikmenn AC Milan ánægðir með Beckham

Leikmenn AC Milan segja að þeir myndu taka David Beckham opnum örmum ef hann kæmi til félagsins á lánssamningi í janúar næstkomandi.

Þetta sögðu sóknarmennirnir Andriy Shevchenko og Filippo Inzaghi í gær en David Beckham hefur staðfest að viðræður við félagið eiga sér stað þessa dagana.

„Það myndi gleðja okkur alla að fá Beckham," sagði Shevchenko og Inzaghi var ekki síður ánægður. „Ég væri mjög ánægður með ef Beckham kæmi til að hjálpa okkur. Honum yrði mjög vel tekið," sagði Inzaghi.

Beckham sagði í yfirlýsingu í gær að það væri ekkert ákveðið enn sem komið væri. Hins vegar væri ljóst, sama hvort hann færi til Milan eða ekki, að hann kæmi aftur til LA Galaxy þegar að bandaríska MLS-deildin myndi byrja á nýjan leik.