Mílanóliðin ætla að styrkja sig

Það eru athyglisverðar fréttir í ítölskum fjölmiðlum í dag. Ítalíumeistarar Inter eru orðaðir við sóknarmanninn Diego Milito og grannar þeirra í AC Milan við fyrirliða ítalska landsliðsins, Fabio Cannavaro.

Milito er markahæsti leikmaður ítölsku A-deildarinnar það sem af er tímabili en hann hefur skorað 12 mörk fyrir Genoa. Milito kom frá Real Zaragoza í ágúst. Inter býst við að missa Adriano í janúar og er Milito ætlað að fylla skarð hans.

Varnarmaðurinn Fabio Cannavaro hefur enn ekki skrifað undir nýjan samning við Real Madrid. Hann hefur verið orðaður við uppeldisfélag sitt Napoli en AC Milan hugsar hann sem skammtímalausn við vandræðum í varnarlínu sinni. Alessandro Nesta og Philippe Senderos eru á meiðslalistanum og horfir Milan því til hins 35 ára Cannavaro.