Galliani fundar með Ancelotti

Chelsea vann 5-0 sigur á AC Milan á æfingamóti sem fram fór um helgina. Adriano Galliani, varaforseti AC Milan, hefur boðað þjálfarann Carlo Ancelotti á fund í dag þar sem ræða á leikinn.

„Meiðslalisti okkar er langur og aðeins einn af sex sóknarmönnum okkar er heill. Það afsakar samt ekki þessi úrslit. Ég hitti Ancelotti á þriðjudag og við ræðum hvað gerðist," sagði Galliani.

„Þessi úrslit valda mér ahyggjum þar sem Milan er eitt þekktasta fótboltalið heims. Við megum ekki vera okkur svona til skammar. Ég er samt viss um að við höfum nægilega sterkt lið," sagði Galliani.

AC Milan hefur ekki verið sannfærandi á undirbúningstímabilinu og hefur enn ekki náð að vinna leik.