Steinar Nilsen þjálfar Brann

Steinar Nilsen hefur verið ráðinn þjálfari Íslendingaliðsins Brann í norska boltanum. Nilsen er 36 ára og hefur skrifað undir þriggja ára samning við Brann.

Nilsen lagði skóna á hilluna 2004 en hann lék sem varnarmaður og á tvo landsleiki fyrir Noreg. Hann lék með Tromsö á sínum tíma og einnig á Ítalíu með Napoli og um skamma stund með AC Milan.

Nilsen hefur verið aðalþjálfari Tromsö síðan 2006 en hefur nú verið ráðinn til Brann. Fimm Íslendingar eru hjá liðinu en það eru þeir Ármann Smári Björnsson, Birkir Már Sævarsson, Gylfi Einarsson, Kristján Örn Sigurðsson og Ólafur Örn Bjarnason.