Totti vill enda ferilinn hjá Steua Búkarest

Francesco Totti, fyrirliði Roma á Ítalíu, sló á létta strengi á blaðamannafundi eftir að Roma tapaði 3-1 fyrir rúmenska liðinu Steua Búkarest í æfingaleik um helgina.

Totti hefur verið í herbúðum Roma síðan hann var patti og á öll met í sögu félagsins er varða markaskorun og leikjafjölda.

Hann fékk höfðinglegar móttökur í Rúmeníu þrátt fyrir að geta ekki spilað vegna meiðsla og grínaðist með það að hann vildi klára ferilinn sem leikmaður með Steua.

"Ef marka má viðtökurnar sem ég fékk hérna, er ekki loku fyrir það skotið að ég komi hingað og ljúki knattspyrnuferlinum með Steua þegar ég verð orðinn 45 ára gamall," sagði Rómverjinn.

Totti lék sinn fyrsta leik fyrir Roma aðeins 16 ára gamall árið 1993 og er í guðatölu í vínrauða hluta Rómar.