Gerir Mourinho innrás hjá Chelsea?

Jose Mourinho, nýráðinn þjálfari Inter á Ítalíu, útilokar ekki að hann muni reyna að fá eitthvað af fyrrum leikmönnum sínum hjá Chelsea til liðs við sig í framtíðinni.

Mikið hefur lengi verið slúðrað um að Mourinho muni reyna að fá menn eins og Frank Lampard, Didier Drogba, Michael Essien og Ricardo Carvalho til sín.

"Það er eðlilegt að menn hugsi um þetta, því ég á sérstakt samband við fyrrum leikmenn mína. Ég naut þess að starfa með þeim og þeir nutu þess að spila fyrir mig. Þetta fer hinsvegar mikið eftir því hvort Chelsea vill selja," sagði Mourinho og bætti við að hann væri þegar farinn að setja niður nöfn á blað fyrir forseta Inter - en vildi ekki ræða þau í fjölmiðlum.