Mourinho: Zlatan er fyrirbæri

Jose Mourinho, þjálfari Inter, segist eiga von á því að sænski framherjinn Zlatan Ibrahimovic eigi eftir að vinna gullknöttinn í nánustu framtíð og lýsir honum sem fyrirbæri á knattspyrnuvellinum.

Framherjinn skæði hefur farið mikinn á leiktíðinni og á gott samstarf við þjálfara sinn.

"Ég vona sannarlega að hann verði sæmdur gullknettinum fljótlega og ég trúi því að það gerist, því hann er fyrirbæri. Það eina sem hann þarf að gera er að halda áfram því góða starfi sem hann vinnur hjá liðinu," sagði Mourinho.

Hann er líka ánægður með Brasilíumanninn Adriano, sem kom inn sem varamaður og skoraði í Meistaradeildinni í vikunni.

Mourinho segir þó mikilvægt að hafa báða fætur á jörðinni þegar kemur að Brasilíumanninum.

"Það er alltaf gott að sjá mann koma af bekknum og skora. Það þýðir að skiptingin hafi verið rétt. Hann hefur tekið fyrstu skrefin en ég ætla ekki að missa mig barra af því hann skoraði. Ég er ánægður með Adriano, en ég á von á betri hlutum frá honum," sagði Mourinho.