Eiður heldur möguleikunum opnum

Framtíð Eiðs Smára Guðjohnsen er enn í óvissu. Hann hefur verið orðaður við mörg lið í sumar eftir að hafa gengið illa að vinna sér inn sæti í sterku liði Barcelona.

Eiður hefur verið orðaður við West Ham, Manchester City og Portsmouth í enska boltanum og þá hefur franska liðið Marseille víst einnig augastað á Eiði.

Eiður fer með Barcelona í æfingaferð til Skotlands en hann segir í viðtali við Sky að engin ákvörðun hafi verið tekin um framtíð sína. „Ég er bara að hugsa um að koma mér í form fyrir tímabilið, svo sjáum við hvað framtíðin ber í skauti sér," sagði Eiður.

Aðspurður hvort hann væri pottþétt á leið frá Barcelona sagði hann: „Nei það er ekkert pottþétt í fótbolta. Ég er opinn fyrir öllu en er bara að einbeita mér að því að komast í form."