Inter með í baráttunni um Ronaldinho

Ítalíumeistarar Inter eru með í baráttunni um brasilíska sóknarmanninn Ronaldinho hjá Barcelona. Sagt hefur verið að búið sé að ganga frá munnlegu samkomulagi um að Ronaldinho fari til AC Milan í sumar.

Massimo Moratti, forseti Inter, segist ætla að skoða möguleikann á að krækja í Ronaldinho. „Við höfum átt í góðum samskiptum við Barcelona og umboðsmann Ronaldinho, við teljum okkur því vera í góðri stöðu," sagði Moratti.

Ronaldinho er 28 ára og hefur átt ansi erfitt uppdráttar með Barcelona á yfirstandandi tímabili. Á síðasta ári börðust þessir erkifjendur, AC Milan og Inter, um sóknarmanninn David Suazo sem valdi síðan Inter.