Soros vill kaupa Roma

Auðkýfingurinn George Soros hefur áhuga á að kaupa ítalska liðið Roma. Í yfirlýsingu frá Roma er staðfest að viðræður um kaupin hafi átt sér stað. Fyrirtækið Italpetroli á í dag 67% hlut í félaginu.

Ítalskir fjölmiðlar hafa heimildir fyrir því að viðræðurnar muni halda áfram í næstu viku. Italpetroli á víst í vandræðum með að borga upp skuldir félagsins.

Soros er 77 ára auðkýfingur sem fæddur er í Ungverjalandi en hefur bandarískt ríkisfang. Hann er 80. ríkasti maður heims samkvæmt lista Forbes en þess má geta að Björgólfur Þór Björgólfsson er í 249. sæti á þeim lista.