Adriano verður lánaður í janúar

Brasilíski framherjinn Adriano hjá Inter Milan verður að öllum líkindum lánaður frá liðinu þegar félagaskiptaglugginn opnast í janúar. Hann hefur alls ekki náð sér á strik með liðinu undanfarið og þjáist af þunglyndi.

Þessi ákvörðun var tekin af varaforseta Inter í gær eftir að hann átti fund með leikmanninum og umboðsmanni hans. Til greina kom að lána Adriano fyrir leiktíðina, en hann vildi þá ekki fara frá Inter.

Hann hefur komið aðens fjórum sinnum við sögu til þessa á leiktíðinni hjá Inter og er sem stendur fimmti kostur í framlínu liðsins á eftir þeim Zlatan Ibrahimovic, Hernan Crespo, Julio Cruz og David Suazo.

Sagt er að Inter ætli ekki að setja fyrir sig hvert Adriano fer sem lánsmaður ef til þess kemur, en sagt er að West Ham og Manchester City séu félög sem hafi áhuga á að fá hann í sínar raðir.