Emil í byrjunarliðinu

Emil Hallfreðsson heldur sæti sínu í byrjunarliði Reggina í dag. Tveir leikir fóru fram á Ítalíu í gær.

Þjálfari Reggina var rekinn í vikunni og Renzo Ulivieri stýrir liðinu í dag. Hann stillir liðinu upp samkvæmt 3-5-2 leikkerfinu og er Emil vinstra megin á miðjunni en ekki á vinstri kantinum eins og hingað til.

Reggina mætir Napoli á útivelli og má búast við erfiðum leik.

Tveir leikir fóru fram í gær og var aðeins eitt mark skorað í þeim.  Það gerði Giampaolo Pazzini fyrir Fiorentina sem vann Lazio á útivelli, 1-0. Í hinum leik kvöldsins gerðu AC Milan og Torino markalaust jafntefli.

Massimo Mutarelli, leikmaður Lazio, fékk að líta rauða spjaldið seint í leiknum. 

AC Milan er nú komið upp í sjöunda sæti deildarinnar eftir fremur slappa byrjun á tímabilinu. Fiorentina komst með sigrinum upp í annað sæti deildarinnar í bili en Roma og Juventus geta komist upp fyrir liðið með sigri í dag.

Torino er í tólfta sæti fyrir leiki dagsins og Lazio í því fjórtánda.

Leikir dagsins á Ítalíu:

Cagliari - Sampdoria

Catania - Atalanta

Empoli - Roma

Genoa - Palermo

Livorno - Udinese

Napoli - Reggina

Parma - Siena

Juventus - Inter (kl. 19.30)

Allir leikirnir hófust klukkan 14.00 nema stórleikur helgarinnar, viðureign Juventus og Inter sem verður kvöldleikur dagsins.