Ancelotti: Tek við Roma næst

Carlo Ancelotti, þjálfari AC Milan frá 2001, segir að Roma verði að teljast ansi líklegur möguleiki þegar hann skiptir næst um starf. Ancelotti lék með gullaldarliði Roma á níunda áratugnum.

Ancelotti er nú á sínu sjöunda tímabili með Milan og hefur þar unnið einn meistaratitil og tvo Evróputitla. Hann þykir valtur í sessi um þessar mundir eftir lélegt gengi Milan í deildinni, en hann virðist ekki í vafa um hver verði næsti viðkomustaður sinn á giftusömum þjálfaraferlinum.

"Ég er ánægður hjá Milan og Spaletti er ánægður hjá Roma en í framtíðinni kæmi vel til greina að við skiptum um vinnustað. Ef litið er á fyrri reynslu mína er Roma eina liðið á Ítalíu sem kemur til greina. Ég fer ekki að fara yfir til Inter - og ekki fer ég til Juventus aftur - eða þá Lazio. Roma væri upplagt lið fyrir mig til að skemma ekki það sem ég hef gert í fortíðinni og ef það verður ekki á lausu, mun ég líklega taka við liði erlendis eða þá landsliði," sagði Ancelotti.