Jafntefli hjá Emil og félögum

Emil Hallfreðsson lék allan leikinn fyrir Reggina sem gerði 1-1 jafntefli við Palermo á útivelli í dag.

Bæði mörk leiksins komu í blálokin. Fyrst skoraði Nicola Amoruso fyrir Reggina en Amauri jafnaði metin fyrir Palermo áður en flautað var til leiksloka.

Reggina er þó enn í næstneðsta sæti deildarinnar með fjögur stig eftir sjö leiki. Liðið á enn eftir að vinna sinn fyrsta sigur á leiktíðinni.

Inter Milan er á toppi deildarinnar með sautján stig en liðið vann Napoli í gær, 2-1.

Juventus missteig sig í dag er liðið gerði 1-1 jafntefli við Fiorentina. Bæði Juventus og Roma eru með fjórtán stig en síðarnefnda liðið vann 3-0 sigur á Parma í dag.

Í kvöld mætast svo Lazio og AC Milan. 

Úrslit annarra leikja:

Catania-Livorno 1-0

Genoa-Cagliari 2-0

Siena-Empoli 3-0

Torino-Sampdoria 1-0