Íslenskt kvikmyndahaust í Danmörku

Kvikmyndin Börn hefur verið valin til að keppa um Gullna svaninn á Alþjóðlegu kvikmyndahátíðinni í Kaupmannahöfn sem stendur yfir dagana 20-30 september. Hátíðin stendur einnig fyrir sérstöku Íslandskvöldi miðvikudaginn 26. september þar sem myndirnar Foreldrar eftir Ragnar Bragason og Vesturport og Mýrin eftir Baltasar Kormák verða sýndar.

Ragnar verður viðstaddur sýninguna og mun svara spurningum gesta á eftir. Ragnar segir það vera mikinn heiður að fá tilnefninguna en Börn hefur þegar fengið þónokkur alþjóðleg verðlaun. "Það er líka gaman að vera hluti af íslensku útrásinni í Danmörku," segir Ragnar en aðstandendur hátíðarinnar segja allt að gerast í íslenskum kvikmyndum og að þær séu orðnar jafn spennandi útflutningsvara og íslensk tónlist og íslenskur matur.

Myndirnar Börn og Foreldrar verða sýndar í almennum kvikmyndahúsum í Danmörku í október og nóvember og Köld slóð opnar Bíódaga á Norðurbryggju þann 6. nóvember.