Adriano leitaði í flöskuna

Brasilíski stjörnuframherjinn Adriano hjá Inter Milan hefur viðurkennt að vandamál hans á síðustu leiktíð megi rekja til óhóflegrar áfengisneyslu. Adriano missti föður sinn og skildi við konu sína með stuttu millibili og segist hafa leitað huggunar í flöskunni.

"Eftir að faðir minn dó og ég skildi við konuna mína, leitaði ég huggunar í áfengi. Ég verð að þakka forseta Inter fyrir stuðninginn og það er ómetanlegt að vita að hann hefur staðið á bak við mig og treystir á mig," sagði Adriano.

Hann missti sæti sitt í brasilíska landsliðinu á síðustu leiktíð og á mjög erfitt verkefni fyrir höndum ef hann ætlar að vinna sér sæti í byrjunarliði Inter á ný eftir að félagið festi kaup á David Suazo.