Nýleg rannsókn leiðir í ljós að iPod-spilarar geta haft truflandi áhrif á gangráða. Hundrað einstaklingar með gangráða og meðalaldurinn 77 ár tóku þátt í tilraun á áhrifum iPodspilara á gangráða sem fram fór í Stofnun hjarta- og æðasjúkdóma í Michigan-ríki í Bandaríkjunum.
Niðurstöður rannsóknarinnar sýndu að í um helmingi tilfella varð vart við raftruflanir í starfsemi gangráðsins þegar iPod var haldið um fimm sentimetrum frá brjósti einstaklings með gangráð í um fimm til tíu sekúndur. Í sumum tilfellum olli iPod truflunum í allt að 45 sm fjarlægð og í einu tilfelli hætti gangráðurinn alveg að virka.
Tilraun sem þessi hefur ekki verið gerð áður, aðallega þar sem ekki hefur þótt þörf á því að fæstir einstaklingar með gangráð eiga iPod. Hins vegar var árið 1997 gerð slík tilraun með GSM-síma. Þar kom í ljós að farsímar geta valdið tímabundnum truflunum á gangráðum og jafnvel ollið óreglulegum hjartslætti.
Með bættri tækni í gangráðum er notendum þeirra þó tjáð af farsímaframleiðendum að GSM-símar séu hættulausir en varast eigi að geyma símann í skyrtuvasa eða beint yfir gangráðnum. Hvort það sama eigi við um iPod-spilara verður tíminn og fleiri rannsóknir að leiða í ljós.
