Bernd Schuster tekur við Real Madrid

Þýski knattspyrnuþjálfarinn Bernd Schuster hefur skrifað undir samning við spænska stórveldið Real Madrid og mun taka við þjálfun þess þann 1. júlí. Þetta fullyrða þýskir fjölmiðlar í dag og segja fulltrúa Schusters hafa staðfest tíðindin. Schuster er þjálfari Getafe í dag en fyrir hjá Real Madrid er ítalski þjálfarinn Fabio Capello.

Sagt er að samkvæmt samningi sem þegar hafi verið undirritaður muni Schuster fá eina milljón evra í vasann ef einhver annar en hann tekur við Real í sumar - en hann verði á sama hátt að greiða félaginu eina milljón evra ef honum snýst hugur þangað til.

Schuster hefur náð undraverðum árangri með spútniklið Getafe í stjórnartíð sinni en hefur aldrei farið leynt með það að hann hafi áhuga á að taka við Madridarliðinu - þar sem hann spilaði á sínum tíma sem leikmaður.